Flyover Nagar : नगर शहरातील मुख्य उड्डाणपुलाचे काम झाल्यानंतर आणखी दोन नवीन उड्डाणपूल होणार आहेत. पोलीस अधीक्षक चौक ते पत्रकार चौक आणि एमआयडीसीतील सह्याद्री चौक या ठिकाणी उड्डाणपूल होणार आहे.
पोलीस अधीक्षक चौकातील उड्डाणपुलाचे काम लवकरच सुरू होणार आहे. यासाठी माती परीक्षण केले जाणार आहे. या माती परीक्षणामुळे नगर शहरात पुन्हा तीन उड्डाणपूल साकारणार असल्याची चर्चा सुरू झाली आहे. या माध्यमातून शहराच्या वैभवात भर पडणार आहे. नगर शहर हे राज्यातील मध्यवर्ती ठिकाण असून या ठिकाणावरून राष्ट्रीय व राज्य महामार्ग जात आहे. यामुळे जड वाहतूक आणि दळणवळण मोठ्या प्रमाणात होत असून परिणामी वाहतूक कोंडी होते. नगर शहराचे विस्तारीकरण झपाट्याने वाढत आहे.
पुढील अनेक वर्षांचा विचार करून नगर शहरांमध्ये उड्डाणपुलाची गरज भासणार आहे. यानिमित्ताने शहरात साकारत असलेले उड्डाणपूल भविष्यात उपयोगी येणार आहे. या माध्यमातून शहर विकासाला देखील गती मिळेल. नगर शहरातील पोलीस अधीक्षक चौकातील उड्डाणपूल कामासाठी माती परीक्षण सुरू झाल्याने नागरिकांकडून समाधान व्यक्त होत आहे. या उड्डाणपूलाचे प्रत्यक्षात काम कधी सुरु होणार याची नागरिकांना प्रतिक्षा लागली आहे.
नगर शहरातील डीएसपी चौक, पत्रकार चौक व सह्याद्री चौक हे वर्दळीचे ठिकाण असून मोठ्या प्रमाणात येथे वाहतुकीची समस्या निर्माण होत आहे. यातून सतत छोटे-मोठे अपघात होवून काही जण जखमी झालेत. तर अनेकांचा दुर्दैवी बळी गेला आहे. मात्र या ठिकाणी उड्डाणपूल झाल्यास वाहतूक कोंडी होणार नाही आणि अपघातावर देखील नियंत्रण येईल.
