Nagar Police News ः दहावीचे पेपर दिल्यानंतर एका १६ वर्षीय अल्पवयीन मुलीचे राहुरी तालुक्यातील सात्रळ परिसरातील एका कॉलेज परिसरातून अपहरण झाल्याची घटना काल २६ मार्चला दुपारी घडली. या घटनेतील पीडित मुलीचा राहुरी पोलिसांनी २४ तासाच्या आत शोध घेऊन तिला शिक्रापूर येथून ताब्यात घेतले.
दहावी शिक्षण घेणारी १६ वर्षीय अल्पवयीन मुलीने काल २६ मार्चला दहावीचा पेपर दिला. यानंतर तिचे राहुरी तालुक्यातील सात्रळ येथील एका कॉलेज परिसरातून अपहरण झाले. या घटनेची माहिती राहुरी पोलीस ठाण्यात अज्ञात व्यक्तीविरोधात अपहरणाचा गुन्हा दाखल झाला. गुन्हा दाखल होताच राहुरी पोलीस पथकाने गुन्हाचे तांत्रिक विश्लेषण करत पीडित मुलीचा शोध घेतला.
या मुलीची माहिती मिळताच पोलीस निरीक्षक संजय ठेंगे यांच्या मार्गदर्शनाखाली हवालदार अशोक शिदे, विकास साळवे, सुरज गायकवाड, राहुल यादव, पोलिस नाईक प्रविण बागुल, प्रमोद ढाकणे, नदीम शेख, सचिन ताजणे, गोवर्धन कदम, अजिनाथ पाखरे, सतीश कुऱ्हाडे, अंकुश भोसले यांच्या पथकाने पीडित मुलीला शिक्रापूर पोलीस ठाणे हद्दीतून ताब्यात घेतले.
अपहरण झालेल्या अल्पवयीन मुलीचा २४ तासाच्या आत शोध घेऊन पीडित मुलीला तिच्या नातेवाईकांच्या ताब्यात देण्यात आले. राहुरी पोलीस पथकाच्या या कारवाईमुळे सर्व सामान्य नागरिकांमधून पोलिसांच्या कामगिरीचे कौतुक होत आहे. पोलीस निरीक्षक संजय ठेंगे यांच्या मार्गदर्शनाखाली हवालदार सोमनाथ जायभाय तपास करीत आहेत.
