गणेशोत्सव विसर्जन मिरवणूक (अनंत चतुर्दशी) आणि मोहंमद पैगंबर जयंती (ईद-ए-मिलादुन्नबी) उत्सवाची मिरवणूक एकाच दिवशी 28 सप्टेंबरला आली आहे. हिंदू-मुस्लिम समाजाचे दोन्ही उत्सव शांततेत साजरा होण्याच्या उद्देशाने अहमदनगर शहरातील तख्ती दरवाजा ईद मिलादुन्नबी कमिटीच्यावतीने पैगंबर जयंतीचा उत्सवाची मिरवणूक रविवारी 1 ऑक्टोबरला काढण्याचा निर्णय घेतला आहे. धार्मिक ऐक्य आणि जातीय सलोख्यासाठी मुस्लिम समाजाने मनाचा मोठेपणा दाखवत घेतलेल्या निर्णयाचे सर्वत्र स्वागत होत आहे.
हिंदू-मुस्लिम समाजाचे महत्त्वाचे सण एकाच दिवशी येत आहेत. दोन्ही उत्सवाचा मिरवणूक मार्ग व वेळ एकच आहे. त्यामुळे पोलिस प्रशासनापुढे बंदोबस्ताचा मोठा पेच निर्माण झाला होता. अहमदनगर शहरात धार्मिक एकता व सामाजिक सलोखा कायम राहण्यासाठी मुस्लिम समाजाने पुढाकार घेवून मोहंमद पैगंबर जयंती उत्सव साजरा करण्याच्या उद्देशाने तख्ती दरवाजा ईद मिलादुन्नबी कमिटी, मोहरम उत्सव समिती, समाजातील प्रतिष्ठित नागरिक, सर्व यंग पार्टीचे प्रमुख व धर्मगुरू यांच्या उपस्थितीमध्ये तख्ती दरवाजा मशिदीमध्ये बैठक पार पडली.
या बैठकीत 28 सप्टेंबरला मोहंमद पैगंबर जयंती घरोघरी व मशिदीत साजरी करुन प्रसादाचे वाटप केले जाणार आहे. सार्वजनिक मिरवणुक रविवारी 1 ऑक्टोबरला काढण्याचा सर्वानुमते निर्णय या बैठकीत घेण्यात आला. मोहंमद पैगंबर यांनी ईस्लाम धर्माला शांती व प्रेमाचा संदेश दिला असून, त्याचे विचार जीवनात आचरण करुन आणि समाजात शांतता व प्रेम अबाधित राहण्यासाठी हा निर्णय घेण्यात आल्याची माहिती तख्ती दरवाजा ईद मिलादुन्नबी समितीचे अध्यक्ष शेख अब्दुल कादीर व मोहरम उत्सव समितीचे अध्यक्ष करीम हुंडेकरी यांनी दिली.
