Nagar Political : लोकसभा निवडणुकीमुळे भाजप २४ तास करण्याच्या मूडमध्ये आहे. संघटन बळकटीकरणावर भाजप भर देताना दिसतो आहे. यातूनच भाजपने प्रदेश कार्यकारिणी जाहीर केली आहे. यावर निमंत्रित सदस्यांना जिल्ह्यातून घेण्यात आले आहे. नगर जिल्ह्यातील पाच जणांना संधी देण्यात आली आहे. प्रदेशाध्यक्ष चंद्रशेखर बावनकुळे यांनी तशी नावे जाहीर केली आहेत.
भारतीय जनता पक्षाचे प्रदेशाध्यक्ष चंद्रशेखर बावनकुळे यांनी नगर शहरातील पाच कार्यकर्त्यांची प्रदेश कार्यकारणीत निमंत्रित सदस्यपदी एकाचवेळी नियुक्ती केली आहे. एकाचवेळी नगर शहरातील पाच कार्यकर्त्यांची प्रदेश कार्यकारणीत नियुक्ती होण्याची ही पहिलीच वेळ आहे. भिंगार शहरातील कॅंटोन्मेंट बोर्डाचे उपाध्यक्ष वंसत राठोड, माजी शहर जिल्हा उपाध्यक्ष संतोष गांधी, माजी स्थायी समिती सभपती नरेंद्र कुलकर्णी, महिला ओबीसी विभागाच्या माजी शहराध्यक्षा रेखा विधाते आणि शशांक कुलकर्णी यांची भाजपच्या प्रदेश कार्यकारिणीत निमंत्रित सदस्यपदी नियुक्ती करण्यात आली आहे.
काही दिवसातच लोकसभा निवडणुकीची आचारसंहिता जाहीर होईल. यानतंर लगेचच स्थानिक स्वराज्य संस्था आणि विधानसभा निवडणुकीचे वारे वाहू लागतील. या पार्श्वभूमीवर भाजप हे २४ तास संघटन बळकटीकरणावर काम करत आहेत. यासाठी संघटनेत विविध नियुक्त्या देऊन कार्यकर्त्यांना गोंजारले जात आहे. काम करून घेतले जात आहे. यातच प्रदेश कार्यकारिणी देखील महत्त्वाची भूमिका बजावत असते. या कार्यकारिणीत संधी मिळावी, यासाठी कार्यकर्त्यांमध्ये रस्सीखेच असते. भाजप प्रदेशने आता नियुक्ता जाहीर केल्या आहेत. या नियुक्त्या महत्वाच्या मानल्या जातात.
पालकमंत्री राधाकृष्ण विखे, खासदार सुजय विखे, प्रदेश उपाध्यक्ष आमदार राम शिंदे, प्रदेश कार्यकारिणी सदस्य प्रा. भानुदास बेरड, भाजप विधानसभा निवडणूक प्रमुख महेंद्र गंधे, शहर जिल्हाध्यक्ष अॅड.अभय आगरकर यांनी निवड झालेल्या सदस्यांचे कौतुक केले आहे.
