Salutation to woman power ः पंतप्रधान नरेंद्र मोदी यांनी आज नारीशक्ती वंदन या कार्यक्रमाच्या अंतर्गत कर्जत मंडलामधील महिलांना दूरदृष्य प्रणालीद्वारे मार्गदर्शन केले. पंतप्रधान नरेंद्र मोदी यांच्या नेतृत्वाखाली आज बचत गटातील महिलांना सक्षमीकरणासाठी कर्ज व साहित्य वाटपाचे वितरण खासदार सुजय विखे यांनी केले.
रवर्षी जिल्हा नियोजनाच्या माध्यमातून अनेक आश्वासने दिली जातात. पण महिला सक्षमीकरणासाठी कोणतेही काम झाले नव्हते. मात्र यावेळी पालकमंत्री राधाकृष्ण विखे यांनी जिल्हा नियोजन अंतर्गत महिलांना ४० कोटी रुपयांचा निधी देऊन महिलांना आर्थिकदृष्ट्या सक्षम करण्यासाठी महिलांना न्याय देण्याचा प्रयत्न केला आहे. जोपर्यंत महायुती सरकार आणि पालकमंत्री राधाकृष्ण विखे असतील तोपर्यंत जिल्ह्यातील महिला बचत गटांना कुठल्याही निधीची कमतरता पडणार नाही, अशी ग्वाही खासदार विखे यांनी दिली.
बचत गटातील महिलांना साहित्य व कर्ज वाटपाच्या कार्यक्रमात ते बोलत होते. तालुकाध्यक्ष शहाजीराजे भोसले, शेखर खरमरे, शबनम इनामदार, प्रभा पाटील, शामल थोरात, नीता कचरे, विक्रम भोसले, संजय तापकीर प्रमुख उपस्थित होते. कर्जत तालुक्यासाठी मागील जिल्हा नियोजन अंतर्गत १३ महिला बचत गटांना ६५ लाख रुपयांचे साहित्य वाटप केले होते. यावेळी आमदार राधाकृष्ण विखे पाटील यांनी जिल्हा नियोजन विकास योजनेच्या अंतर्गत ४० महिला बचत गटांना दोन कोटी रुपयांचे साहित्य व कर्ज वाटप करण्यासाठीच्या निधीची तरतूद केली आणि प्रत्यक्षात वाटप देखील सुरू आहे. यामध्ये मसाला कांडप, शेवया मशीन, पिठाची गिरणी, स्टॉल आदी वस्तूंचा समावेश आहे.
तसेच पुढच्या वर्षी ज्या जिरायत पट्ट्यामध्ये किंवा तालुक्यात जे पीक जास्त प्रमाणात घेतले जाते. त्या पिकासाठी आपण उमेद व महावीग यांना सांगून आपणास जे काही साहित्य अपेक्षित राहील त्याबाबत कळवावे. लागेल ते साहित्य पुरवण्याचे काम खासदार विखे करेल, असे देखील उपस्थितांना त्यांनी आश्वासित केले.
निस्वार्थ भावनेने तालुक्याच्या विकासासाठी वारंवार काम करण्याचा प्रयत्न केला आहे. एक सुशिक्षित व्यक्ती निवडून दिल्यानंतर आपल्या भागाचा विकास कसा होतो याचे उदाहरण खासदार विखे यांनी दिले. नगर-करमाळा अंतर कापण्यासाठी पूर्वी चार तास लागत होते. मात्र आता काम मार्गी लावून वेळेची बचत कशी झाली याचे उदाहरण खासदार विखे यांनी दिले आणि नगर-करमाळाचे काम अवघ्या १८ महिन्यात पूर्ण करून तो रस्ता नागरिकांसाठी खुला केला. सध्या काही लोक आम्ही किती गरीब हे समाजापुढे दाखवत असतात. पण ती नंतर कसे श्रीमंत होतात कळत सुद्धा नाही. एक सुशिक्षित व आर्थिकदृष्ट्या सक्षम असलेला लोकप्रतिनिधी निवडून दिला, तर तो कुठल्याही कामांमध्ये टक्केवारी न घेता काम कसे पूर्ण होईल याकडे जास्त लक्ष देतो. दरम्यान विखे यांनी यावेळी विरोधकांना चांगलेच खडे बोल सुनावले व विखे हे कामातून उत्तर देत असतात. तालुक्याची विकासक गती, कशी वाढवता येईल यासाठी प्रामाणिक प्रयत्न सर्वांनी केले पाहिजेत, असे मत देखील खासदार विखेंनी यावेळी मांडले.
