Lok Sabha Election 2024 ः अहमदनगर व शिर्डी लोकसभा मतदार संघाच्या सार्वत्रिक निवडणूक प्रक्रियेत कायदा व सुव्यवस्था अबाधित राहण्यासाठी जिल्हाधिकारी सिध्दाराम सालीमठ यांनी कोरडा दिवसाचा आदेश जारी केला आहे. मतदान संपण्याच्या 48 तास आधीपासून म्हणजे 11 ते 13 मे रोजी या कालावधीत व मतमोजणी चार जूनचा संपूर्ण दिवस कोरडा दिवसाचा (ड्राय डे) आदेश लागू राहणार आहे. अहमदनगर जिल्हा व जिल्ह्याच्या सीमेला लागून असलेल्या इतर जिल्ह्यातील पाच किलोमीटर क्षेत्रासाठी कोरडा दिवस अंमलबजावणी करण्याचे जिल्हाधिकाऱ्यांचे आदेश आहेत.
लोकप्रतिनिधीत्व अधिनियम 1951 च्या कलम 135 (सी) अन्वये व मुंबई दारूबंदी कायदा, 1949 चे कलम 142च्या अधिकाराचा वापर करून जिल्हाधिकाऱ्यांनी कोरडा दिवसाचा आदेश जारी केला आहे. दिंडोरी (नाशिक), नाशिक, भिवंडी (ठाणे) या लोकसभा मतदार संघातील मतदानाचा दिवस 20 मे 2024आहे. बारामती (पुणे), उस्मानाबाद, माढा (सोलापूर) या लोकसभा मतदार संघातील मतदानाचा दिवस सात मे रोजी असल्यामुळे या मतदार संघाच्या सीमेलगत अहमदनगर जिल्ह्यातील पाच किलोमीटर अंतरावर कोरडा दिवस लागू असल्याचा आदेशही अहमदनगर जिल्हाधिकाऱ्यांनी काढला आहे. या आदेशानुसार अहमदनगर जिल्हा व जिल्ह्याच्या सीमेलगत असलेल्या पाच किलोमीटर अंतरावर सर्व प्रकाराच्या मद्य विक्रीची दुकाने (अनुज्ञप्त्या) बंद राहतील.
अहमदनगर जिल्ह्याच्या सीमेला लागून असलेल्या जालना, औरंगाबाद, शिरूर (पुणे), बीड या लोकसभा मतदार संघाचा निवडणूकीचा मतदानाचा दिवस 13 मे 2024 असल्याने त्यादिवशी कोरडा दिवस ठेवण्याचा आदेश त्या लोकसभा मतदार संघातील जिल्हाधिकाऱ्यांनी काढले आहेत. त्यामुळे अहमदनगर जिल्हाधिकाऱ्यांनी वेगळा आदेश जारी केलेला नाही. सर्व दारू विक्रेत्यांनी आपले दुकानातील (अनुज्ञप्त्या) देश व विदेशी, इतर अनुज्ञप्त्या असलेल्या दारूची विक्री मतदान संपण्याच्या 48 तास आधीपासून म्हणजे 11 ते 13 मे रोजी या कालावधीत व मतमोजणी चार जूनचा संपूर्ण दिवस बंद ठेवावी. असे ही आदेशात नमूद आहे.
या कार्यक्षेत्रातील राज्य उत्पादन शुल्क विभागाचे निरीक्षक, दुय्यम निरीक्षक, भरारी पथकांनी मद्याची विक्री, वाहतूक व दुकाने (अनुज्ञप्त्या) उघड्या राहणार नाहीत, याबाबत दक्षता घ्यावी. सदर आदेशाचे उल्लंघन करणाऱ्या अनुज्ञप्ती (दारू विक्री दुकान) चा दारू विक्रीचा परवाना कायमस्वरूपी रद्द करण्यात येईल. अशा सूचना ही जिल्हाधिकारी सिध्दाराम सालीमठ यांनी त्यांच्या आदेशात दिल्या आहेत.
