Ahmednagar Municipal Corporation Budget 2024 ः महापालिकेच्या प्रशासकीय महासभेत १ हजार ५६० कोटी ९१ लाखांचे अंदाजपत्रक मंजूर करण्यात आले. अंदाजपत्रकात कोणतीही करवाढ सूचविली नाही. परंतु महापालिका नगरकरांना मोजून पाणी देणार आहे. त्यासाठी नळांना मीटर, तर उपनगरांसाठी स्वतंत्र भूयारी गटार देणार आहे.
प्रशासक तथा आयुक्त डॉ. पंकज जावळे यांनी आज एक हजार ४०० कोटी ९१ लाखांचे मुळ अंदाजपत्रक प्रशासकीय स्थायी समितीला सादर केले. स्थायीने त्यात वाढ सूचवली. एक हजार ५६० कोटी ९१ लाखांचे अंदाजपत्रक महासभेला सादर केले. महासभेने त्यास मंजुरी दिली. अतिरिक्त आयुक्त डॉ. प्रदीप पठारे, उपायुक्त श्रीनिवास कुरे, डॉ. सचिन बांगर, प्रभारी उपायुक्त सपना वसावा, नगरसचिव मेहेर लहारे, मुख्यलेखाधिकारी डॉ. सचिन धस, मुख्य लेखापरीक्षक विशाल पवार, शहर अभियंता मनोज पारखे, नगर रचनाकार राम चारठणकर, जल अभियंता परिमल निकम, राकेश कोतकर, श्री साळी, अनिल लोंढे, सुधाकर भुसारे, शेखर देशपांडे उपस्थित होते.
आयुक्त डॉ. जावळे यांनी सादर केलेल्या अंदाजपत्रकात नगर शहर विकासासाच्या दृष्टीने भरीव तरतूद करण्यात आली आहे. अंदाजपत्रकात महसुली उत्पन्न ४३० कोटी ८ लाख, तर भांडवली जमा एक हजार ५० कोटी ८ लाख अपेक्षित आहे. तसेच महसूली उत्पन्नात संकलित करापोटी १०३ कोटी रूपयांचे उत्पन्न अपेक्षित आहे. उपनगरांसाठी स्वतंत्र भुयारी गटार योजना राबविण्यात येणार आहे. त्यासाठी अंदाजपत्रकात शंभर कोटी रूपयांची तरतूद करण्यात आली आहे. नगर शहरातील चौकांचे लोकसहभागातून सुशोभिकरण, महापालिका शाळांचे डिजिटलायझेशन, मोकाट कुत्र्यांचा बंदोबस्त, उद्यानांची दुरूस्ती अशा विविध सेवा-सुविधांवर अंदाजपत्रकात भर देण्यात आला आहे.
असे आहे अंदाजपत्रक
महसुली उत्पन्न- ४३० कोटी ८२ लाख रुपये, तर भांडवली जमा – १०५० कोटी ८ लाख रूपये आहे. यात प्रमुख खर्चांमध्ये वेतन व भत्ते- १६९ कोटी रुपये, पेन्शन- ४९ कोटी रुपये, पाणीपुरवठा वीजबिल- ३६ कोटी रुपये, पथदिवे वीजबिल – सहा कोटी रुपये, महापालिकेच्या शिक्षकांचे वेतन- सात कोटा रुपये, कचरा संकलनावर खर्च दोन कोटी रुपये, टॅंकरने पाणीपुरवठा खर्च तीन कोटी रुपये, वाहन खरेदीसाठी एक कोटी रुपये, नवीन रस्ते- ५० कोटी रुपये, रस्ते दुरूस्तीवर चार कोटी रुपये आणि पुतळे बसविण्यावर दोन कोटी रुपयांची तरतूद करण्यात आली आहे.
पाणी योजनेसाठी दीडशे कोटीचे कर्ज घेणार
आयुक्त पंकज जावळे म्हणाले, “नगरकरांवर कोणतीही करवाढ लादण्यात आलेली नाही. अंदाजपत्रक सादर करताना सेवा-सुविधांवर भर देण्यात आलेला आहे. उपनगरांसाठी स्वतंत्र भुयारी गटार योजना, मीटरद्वारे पाणीपुरवठा, चौकांचे सुशोभिकरण, चांगले रस्ते यासारख्या सुविधांसाठी अंदाजपत्रकात तरतूद आहे”. तसेच नगर शहरातील मालमत्तांचे सर्व्हेक्षण करण्यात येणार आहे. त्यात अनधिकृत नळजोडांची संख्या समोर येणार आहे. नळांना मीटर बसविण्याचा प्रस्ताव सरकारकडे सादर केला आहे. तो मंजुरीनंतर प्रत्येक नळाला मीटर बसविण्यात येणार आहे. त्यातून मोठी पाणी बचत होणार आहे. याशिवाय पाणी पुरवठ्यासाठी सुमारे ४९५ कोटी रूपयांच्या योजना प्रस्तावित आहेत. या योजना दोन टप्प्यात राबविण्यात येणार आहेत. त्यात महापालिकेला स्वःहिस्सा भरावा लागणार आहे. त्यासाठी दीडशे कोटी रूपये कर्ज घेण्यात येणार आहे. अमृत योजनेंतर्गत उपनगरात भुयारी गटार योजना (फेज-२) राबविण्यात येणार आहे. त्यासाठी अंदाजपत्रकात शंभर कोटींची तरतूद करण्यात आल्याची माहिती आयुक्त जावळे यांनी दिली.
