अहमदनगर ः पाथर्डी तालुक्यातील अकोले गावातील रहिवाशी असलेले माजी केंद्रीय मंत्री बबनराव ढाकणे यांचे (वय 85) यांचे आज शुक्रवारी सकाळी साडेदहा वाजता वृद्धपकाळाने निधन झाले. राष्ट्रवादीचे प्रदेश सरचिटणीस नेते वकील प्रतापराव ढाकणे यांचे ते वडील होते. बबनराव यांना तीन अपत्ये होती.
वृद्धत्वामुळे गेल्या काही दिवसांपासून ते आजारी होते. नगरमधील खासगी रुग्णालयात त्यांच्यावर उपचार सुरू आज शुक्रवारी सकाळी साडेदहा वाजता त्यांची प्राणज्योत मालवली. त्यांचे पार्थिव अंतिम दर्शनासाठी उद्या शनिवारी दुपारी एक वाजेपर्यंत पाथर्डीतील हिंद वसतीगृह येथे ठेवण्यात येणार आहे. पाथर्डीतील पागोरी पिंपळगाव येथे त्यांच्या पार्थिवावर शनिवारी दुपारी दोन वाजता अंत्यसंस्कार होतील, अशी माहिती त्यांचे पुत्र प्रतापराव ढाकणे यांनी दिली.
महाराष्ट्रातील बीड लोकसभा मतदारसंघातून जनता दलातर्फे नवव्या लोकसभेवर निवडून गेले होते. भारतीतील पहिले वंजारी समाजाचे खासदार होण्याचा मान त्यांना मिळाला होता. चंद्र शेखर यांच्या सरकारमध्ये ऊर्जा संसाधनमंत्री होते. गोवा मुक्तिसंग्रामात त्यांनी भाग घेतला होता.
बबनरावांचा जन्म 10 नोव्हेंबर 1937 अकोले (ता. पाथर्डी) या गांवी झाला. बबनरावांना एकूण आठ भावंडे. यात चार बहिणी आणि चार भाऊ. भावांमध्ये बबनराव सर्वात थोरले. जिल्हा लोकल बोर्डामार्फत चालविल्या जाणा-या प्राथमिक शाळेत बबनरावांचे चौथीपर्यंतचे शिक्षण अकोले येथे 1943 ते 1947 या कालखंडात झाले. माध्यमिक शिक्षण आठवीपर्यंतचे नगरच्या तिलोक जैन शाळेत झाले होते.
