…अन् राहुल गांधींची एन्ट्री!

लाेकसभा आणि राज्यसभेत काॅंग्रेसविरुद्ध भाजप रणकंदन सुरू असताना पुण्यातील कसबा पाेटनिवडणुकीचे वातावरण चांगले तापू लागले आहे. आता या पाेटनिवडणुकीत काॅंग्रेसचे नेते राहुल गांधी एन्ट्री केली आहे. काॅंग्रेसचे बंडखाेर उमेदवार बाळासाहेब दाभेकर यांनी उमेदवारी मागे घेतली असून, यासाठी राहुल गांधी यांचा फाेन आल्याचे त्यांनी जाहीरपणे सांगितले. कसबा निवडणुकीत प्रमुख पक्षांसह तब्बल 29 उमेदवारांनी उमेदवारी अर्ज दाखल केले आहेत. गेल्या 40 वर्षांपासून पक्षासाठी काम करत असलेले आणि पक्षाने उमेदवारी डावलल्याने दाभेकर यांनी बंडखाेरीचे निशाण फडकवले हाेते. अपक्ष म्हणून उमेदवारी अर्ज दाखल केला हाेता. सध्या महाराष्ट्रात काॅंग्रेसचे डाेकेदुखी वाढली असतानाच दाभेकर यांच्या बंडखाेरीने त्यात आणखी भर पडली हाेती. यावर प्रदेश पातळीवर अनेक ताेडगे काढण्यात आले. परंतु पक्षश्रेष्ठी राहुल गांधी यांचा दाभेकर यांना फाेन आला आणि त्यांनी निवडणुकीत माघार घेतल्याचे जाहीर केले. राहुल गांधी यांची कसबा पाेटनिडवणुकीत एन्ट्री ही आगामी काळातील काॅंग्रेसचे निवडणुकीचे प्लॅनिंग सांगणारी आहे, असे जाणकारांचे म्हणणे आहे. कसबा पोटनिवडणुकीत मुख्य लढत ही भाजपचे हेमंत रासने आणि काँग्रेसचे रवींद्र धंगेकर यांच्यात होणार असल्याचे आता स्पष्ट झाले आहे. हिंदू महासभेचे आनंद दवे आणि अभिजित बिचुकले हेदेखील निवडणुकीच्या रिंगणात आहेत. भाजपने टिळक घराण्यातील व्यक्तीला उमेदवारी नाकारल्याने कसब्यातील ब्राह्मण समाज नाराज झाल्याची चर्चा आहे.